Clinig Asesu Clinigol ar gyfer Iselder Gwrthiannol (CARE).
Mae Clinig CARE Caerdydd yn glinig newydd i bobl sy’n byw gydag iselder sy’n anodd ei drin. Mae’r clinig yn bartneriaeth rhwng Prifysgol Caerdydd a Bwrdd Iechyd Caerdydd a’r Fro
Diffiniad iselder anodd ei drin yw iselder nad yw wedi gwella er bod y claf wedi rhoi cynnig ar sawl triniaeth flaenorol.
Bydd y clinig yn cynnig asesiad manwl wyneb yn wyneb gydag arbenigwyr ym maes iselder. Bydd hyn yn ein galluogi i ddeall symptomau eich iselder yn well ac argymell y driniaeth/triniaethau gorau
Un o brif nodau’r clinig yw cynnig cyfle i bobl gael mynediad at driniaethau ffarmacolegol neu seicolegol newydd drwy gymryd rhan mewn treialon clinigol.
A oes clinigau arbenigol tebyg eraill?
Oes, mae clinig CARE Caerdydd yn un o 15 o glinigau ymchwil anhwylderau hwyliau arbenigol newydd ledled y DU a sefydlwyd fel rhan o’r Genhadaeth Iechyd Meddwl. Dyma’r unig glinig o’i fath yng Nghymru ac mae’n cael ei ariannu drwy grant gan Swyddfa Gwyddorau Bywyd y DU.
Nod y rhwydwaith hwn yw gwella mynediad at asesiadau arbenigol i bobl sy’n byw gydag iselder sy’n anodd ei drin a chynnig y cyfle iddyn nhw gymryd rhan mewn treialon clinigol sy’n ymwneud ag ystod eang o driniaethau newydd.
Sut mae cymryd rhan?
- Ar hyn o bryd, dim ond atgyfeiriadau gan feddygon teulu rydyn ni’n eu derbyn, er ein bod yn gobeithio ehangu hyn i bobl allu atgyfeirio eu hunain yn y dyfodol.
- Gall meddygon teulu eich atgyfeirio at y clinig hwn os nad ydych chi wedi ymateb yn ddigonol i ddwy driniaeth neu fwy ar gyfer iselder (gan fod yn rhaid i o leiaf un fod yn feddyginiaeth gwrth-iselder)
- Oherwydd natur y clinig hwn, ni allwn ni gynnig cyngor na chymorth ar alwad.
- Felly, nid ydyn ni’n gallu gweld pobl sy’n teimlo’n anniogel neu sydd wedi profi meddyliau hunanladdol difrifol yn ddiweddar – gallai atgyfeiriad at y tîm argyfwng neu wasanaethau iechyd meddwl eilaidd eraill fod yn fwy priodol.
At sylw Meddygon Teulu yn unig
I atgyfeirio rhywun, cysylltwch â: CUPSmooddisordersclinic@caerdydd.ac.uk